Grace & Alfred

都真係非常之咁耐無update了。除左忙同埋懶惰之外,其實最近小明都專注緊係影樓果邊,發展緊寵物相關既野同埋家庭攝影。有興趣既可以參觀下。 黎緊我地會努力陸續慢慢update返轉頭了… XDD

BambiLand

Grace & Alfred 係我既大學同學,大家亦都係教友,所以係佢地既婚禮當中拍攝,感覺其實完全唔似做緊野。我自己係教友,每次影親係教堂行禮既婚禮感覺都會好舒服好親切,同埋一般都係個景已經靚晒。

以前成日聽人講我識左邊個邊個十幾年好似好勁咁,但睇返,原來而家身邊好多朋友都識左十幾廿年了,而當日身邊既朋友同學,都已經陸續開始結婚﹑生小朋友。感覺到自己都開始老了,歲月真係不留人。

再一次恭喜兩位!

Simone & Ken

已經唔知道有幾耐無寫 blog 了,一直影完相,忙,之後又唔想寫了,就咁睇個website仲以為我地已經無做。
向來已經低調既我地,呢兩年更低調。零宣傳﹑近乎零更新。

係呢一年,我拍過唔同既人出去影婚禮,無論係新人只請我做snapshot 或者拍佢地搵返來的video team都好,都令我思考左好多。
呢一年,我都做左人生既第一次司機車朋友去影婚紗相(唔係我影)﹑做兄弟﹑做賓客… 睇左唔同既相同片,感覺而家香港既婚攝界的確係係到進化,不過進化既係背景由香港換左去第二到。

係呢兩年,我有幸成為香港頭幾位加入 ISPWP 既香港攝影師,舊年開始有幸成為左佢地judging committee 既一員,負責睇新入會會員既相同有份投票可唔可以比佢入會同埋comment。

頭幾輯,我覺得好靚,好有氣氛,幾特別。之後睇左幾十輯,發現有一部份真係一式一樣… 手法﹑構圖﹑排版,好多都一樣。當然,除左呢D之外,好多作品都好好。一輯大約50-100張相既婚禮攝影作品,可以令完全唔識新人﹑唔識當地文化既我感受到當日既氣氛同埋聯想到果刻既故事。

婚紗相同埋婚禮當日既相,唔同人有唔同既需求。有人會追求完美技術,有人會追求視覺衝擊。而我睇左咁多唔同地方既結婚相,我終於明白我做左咁多年其實係做緊乜野。

我既攝影生涯始於希望留住回憶,我覺得我做既都係幫人留住回憶同感覺,而唔係要倒模式既千人一面攝影作品。

一對新人同埋周邊既人既關係,可以好開心﹑好甜蜜﹑好好玩﹑好冷漠﹑好串﹑零交流﹑好緊張﹑好衰格﹑好白痴﹑好HEHE﹑好正氣﹑好莊嚴…… 其實無論我用既係乜字,係正面係負面都好,佢地都正正係構成所有氣氛同埋回憶既重要元素。

點解作為攝影師既我要強迫一對好含蓄或者比較COOL 既新人,去做出一D 違反佢地性格既shot?

為左靚?為左易 sell 客?

好多謝咁耐以黎客人對我地既信任。我係華麗與捕捉回憶既天秤之間,選擇左偏向捕捉。我相信,結婚相應該同婚姻一樣歷久不衰,而唔係過兩年再睇就覺得老套或者睇完都唔知自己做緊乜。

柴犬成長日記 - 再次轉糧

好耐都無update 呢到… 最近忙影拍賣會既野同埋執相,無乜時間去update。唯有寫下狗仔,對上一篇狗仔文,都好似成年半之前。

話說上一次 Bambi 由上手傳落黎食開既 Royal Canin 太差,所以諗住幫佢轉糧,最後決定比佢食 Ziwipeak。呢隻糧其實都好好,只不過舊年11月開始,廠方轉左用新既風乾方法後,令到肉質同肉味同以往唔一樣,令到 Bambi 既便便都變得唔靚同埋突然臭左好多。本身諗住由佢,反正食開健康又無唔舒服,但最近加埋天氣熱,情況開始再差少少,包野又剛好就快完,岩晒轉糧。

問左有經驗柴友,有人推乾糧,有人推 K9 Natural。

本身除左 Barf 以外,Ziwipeak算係第二貴既狗糧,最貴係 K9。不過由於 Ziwipeak 最近既技術性錯誤(聽返黎,唔確定)同埋加價之後,Ziwipeak 忽然貴左差唔多成倍,比食 Barf 更貴。

話說本身 Ziwipeak 有5kg 包裝,剛轉果陣一袋好似$1180咁上下,半年後加左價一袋大約 $1300,可以食40-45日咁上下。一直食開都叫做可以接受到既價錢,當每日買多盒叉燒飯比 Bambi 食。
點知早幾個月,全港 5kg 忽然斷貨,有幾間鋪都話:代理向 Ziwipeak 果邊落錯 order… 搞到短期內 (唔知幾短啦)都唔會有5kg 包裝,只有 2.5kg 包裝。

2.5kg 一包 $900左右,理論上係可以食20-22.5日。不過經過三包既實際經驗, 2.5kg 包裝只能用到兩星期左右。唔知係 2.5kg 唔足料,定係5kg加料,我餵既份量都係一樣。計返條數,由原本大約 $30一日加到 $60一日。

經狗友介紹,同比佢實際情況我考慮,最後決定左試住 K9 先。

試兩星期睇下便便有無改善,無既話又要再搵另一 brand。:(

剛落地~ Bambi 似乎知道食得好有興趣。

K9 送果隻 scoop 同埋脫水糧… 隻 scoop 輸左比 ziwipeak,不過大家都係咁唔環保。

之後有結果再寫包膠~

C l i e n t s
N e w s   a n d   P r o m o t i o n s
F a c e b o o k
L i n k s